रितेश देशमुख आणि जेनेलिया डिसुझा यांचा नुकताच प्रदर्शीत झालेला ‘वेड’ चित्रपट ज्याला प्रेक्षकांनी चांगलाच प्रतिसाद दिला आहे. दरम्यान, आपल्या चाहत्यांसाठी आणि सिनेरससिकांसाठी रितेश आणि जेनेलिया या जोडीने पुन्हा एकदा एक मस्त ऑफर आणली आहे. खास ‘व्हॅलेंटाईन विक’ निमित्त या जोडीने नुकताच प्रदर्शित झालेला वेड चित्रपट पाहणाऱ्या प्रेक्षकांसाठी खास ऑफर सुरू केली आहे. या ऑफरप्रमाणे ‘व्हॅलेंटाईन डे’ ला ‘वेड’ चित्रपट फक्त ९९ रुपयांमध्ये पाहता येणार आहे.
होय, हे खरय, कदाचित तुमच्या कानांवर आणि डोळ्यांवर वाचताना विश्वास बसणार नाही. पण, खरोखरच अशी ही ऑफर ठेवण्यात आली आहे.
‘वेड’ चित्रपटाचे तिकीट केवळ ९९ रुपयांमध्ये काढून तुम्ही हा चित्रपट पाहू शकता आणि आपला व्हॅलेंटाईन आणखीनच स्पेशल करू शकता. रितेश देशमुखने त्याच्या सोशल मीडिया पेजवरुन शेअर केलेल्या पोस्टमध्ये या ऑफरबाबत माहिती दिली आहे.या पेजवरुन माहिती देताना रितेशने असे म्हटले आहे की, ‘तुमचा व्हॅलेंटाईन तुम्ही आणखी स्पेशल बनवा तुमच्या ‘वेड’ सोबत. वेड फक्त ९९ रुपयांमध्ये..आताच तुमचं तिकिट बुक करा..’
रितेश देशमुख आणि जेनिलीया देशमुख या जोडीने बॉलिवूडमध्येही काही चित्रपट एकत्र केले आहेत. परंतू,मुख्य अभिनेत्री म्हणून जेनेलियाचा हा पहिला मराठी सिनेमा आहे. रितेश जेनेलियाची जोडी मराठी चित्रपट प्रेमींना आणि दोघांच्याही चाहत्यांना खूपच आवडली आहे. त्यामुळे या चित्रपटाचे बॉक्स ऑफिसवरसुद्धा चांगलेच स्वागत झालेले आहे.या सिनेमाने विक्रमी अशी कमाई केल्यामुळे त्यांच्यावर सर्व बाजूंनी कौतुकांचा वर्षाव होत आहे. चित्रपटाची होणारी कमाई आणि त्याला मिळणारा प्रतिसाद पाहून अनेकांच्या भूवया उंचावल्या आहेत. हे सर्व काहीही असले तरी तुम्ही मात्र या खास व्हॅलेंटाईन ऑफरचा लाभ नक्कीच घेऊ शकता आणि हा सिनेमा फक्त ९९ रुपयांमध्ये पाहू शकता.
This post was last modified on %s = human-readable time difference 7:10 am